1643 год. Предания старины глубокой.

Подробности

Опубликовано 17.11.2019 00:45

Месяца ианнуария в 22-й день Орловскаго уезда Истобенскаго села жена некая Евфимия Бриткина не виде очима своима дванадесять лет и слышав о многоразличных чудесех и исцелениих исходящих от чудотворнаго Спасова образа, обещася ити во град Хлынов помолитися пред ним Господу Богу, и водима сродники своими прииде во храм Божий пред цельбоносный образ, утрудившися же от путнаго шествия вниде в трапезу, и уснув виде в видении стоящу себе пред многочудесным Спасовым образом, и молящуся пред ним со свещею; таже воспрянувши от сна моли пришедших тогда в церковь свяищенников совершити о ней молебное пение, и поставльше свещу паде пред образом Божиим молящися со слезами о прозрении очес своих, и егда начаша пети: Владычице, приими молитву раб твоих, в той часъ абие узре ясно образ Спасов и многонародное людей собрание, и свещное сияние, и тако получивши милость Божию отиде во свояси с радостию славя Бога.

Месяца ианнуария в 30-й день Истобенскаго села девица некая Акилина Жуйкова сущи лет пятинадесять бысть в разслаблении лет десять не могущи владети рукама и ногама, сродницы же привезоша ю во град Хлынов, и принесше к цельбоносному образу Господа Бога и Спаса нашего Иисуса Христа, свещу пред ним поставиша и молебное пение воспеша, со слезами просяще исцеления болящей, и в той час благодатию Божиею исцеление разслабленной своей девице прияша абие, и изыде здрава в путь свой благодаря Бога.

Месяца февруария в 7-й день Истобенскаго села жена некая Агафия Исупова страждаше очною болезнию 6 недель, и обещався прииде во град Хлынов, водима сродники своими, и вшедши в паперть храма Спасова, идеже тогда сияше свет преславных чудес от нерукотвореннаго образа Божия, припаде пред ним плачущи и просящи очесем своим прозрения, егда же поставль свещу соверши молебная пения, абие милосердием Божиим просветишася очи ея, и славящи светодавца Бога отиде в дом свой.

В той же день Истобенской волости житель Иосиф Исупов бе одержим очною скорбию и не виде света 18 лет, и в той болезни своей положи обещание, еже ити ему во град Хлынов помолитися Всемилостивому Спасу пред нерукотворенным Его образом, и егда приведоша его сродницы его к чудотворному образу, падши с верою и со слезами теплыми моляшеся подати очесем его прозрение, поставльши же свещу, моли иереов совершити о нем молебное пение и в том часе внезапу получи исцеление и отиде в дом свой с великою радостию хваля Бога.

Месяца того же в 20-й день Истобенския волости житель Иоанн Чермных боляше лютою болезнию разслабления, не владея ногама своима 5 лет, и слышав от многих о преславных чудесех исходящих от чудотворнаго нерукотвореннаго Спасова образа, обещася помолитися к нему с верою, и привезоша и сродницы его во град Хлынов, и приведоша к храму Божию пред пречистый образ, егда же поставив свещу начат совершати молебная пения моляся со слезами ко Господу Богу, и прося исцеления от Него, в той час удиви Господь Бог над ним милость Свою, и бысть совершенно здрав, возвратися же в путь свой, благодарствуя Господа Бога.

Из "О чудотворной иконе, изображающей лик Спасителя на убрусе, находящейся в Вятском Спасском Соборе." Вятские епархиальные ведомости 1880 г. № 16-17.